Modyul 1: Paggamit ng Pang-abay sa Paglalarawan ng Kilos

Paggamit ng Pang-abay sa Paglalarawan ng Kilos

Ang pang-abay ay ang bahagi ng pananalita na naglalarawan o nagbibigay-turing sa pandiwa,pang-uri,at maging sa kapwa nito pang-abay. Sa Ingles, ito ay tinatawag na adverb.

⮚       Basahin at pag-aralan ang mga sumusunod na pangkat ng pangungusap.

1. Matiyagang tinulungan ni Ysabelle ang kaniyang kapatid sa pagbuo ng  puzzle.

        2.  Dahan-dahan siyang lumusong sa ball pool.

●        Sa unang pangungusap, paano tinulungan ng bata ang kaniyang kapatid sa pagbuo ng puzzle?

        Sagot:     matiyaga

        Ano ang inilalarawan ng salitang matiyaga?

        Sagot: tinulungan

●        Sa ikalawang pangungusap, paano siya lumusong sa ball pool?

Sagot: dahan-dahan

        Anong inilalarawan ng salitang dahan-dahan?

            Sagot:       lumusong

Ang mga salitang matiyaga at dahan-dahan ay naglalarawan ng mga kilos na tinulungan at lumusong. Ang mga ito ay halimbawa ng pang-abay na pamaraan. Ang Pang-abay na Pamaraan ay naglalarawan kung paano ginawa, ginagawa o gagawin ang kilos. Sumasagot ito sa tanong na paano.

⮚       Basahin at pag-aralan ang mga sumusunod na pangkat ng pangungusap.

1.Ang kanilang mag-anak ay pupunta sa Olongapo City upang mamasyal.

2.Nagpadulas siya sa padulasan.

●        Sa unang pangungusap, saan pupunta ang mag-anak upang mamasyal?

Sagot:     sa Olongapo City

Ano ang binibigyang turing ng lugar na Sa Olongapo City?

Sagot:     pupunta

●        Sa ikalawang pangungusap, saan siya nagpadulas?

Sagot:     sa padulasan

Ano ang binibigyang turing ng lugar na sa padulasan?

Sagot:     nagpadulas

Ang mga sagot sa tanong na sa Olongapo City at sa padulasan ay mga salitang nagsasaad kung saan naganap ang kilos. Sa unang pangungusap, isinaad rito na ang kilos na pupunta ay magaganap sa Olongapo City. Sa ikalawang pangungusap, isinaad rito na ang kilos na nagpadulas ay naganap sa padulasan. Ang sa Olongapo City at sa padulasan ay mga halimbawa naman ng pang-abay na panlunan. Ang Pang-abay na Panlunan ay tumutukoy sa lugar na pinangyarihan ng isang kilos. Sumasagot ito sa tanong na saan.

⮚       Basahin at pag-aralan ang mga sumusunod na pangkat ng pangungusap.

1.Maagang nagising si Ysabelle ngayon.

2.Sasakay sila sa bisikleta mamaya.

●        Sa unang pangungusap, kailan nagising nang maaga si Ysabelle?

Sagot:        ngayon

Ano ang binibigyang turing ng salitang ngayon?

Sagot:      nagising

Sa ikalawang pangungusap, kailan sila sasakay sa bisikleta?

Sagot:        mamayaAno ang binibigyang turing ng salitang mamaya?

Sagot:     sasakay

Ang mga sagot sa tanong na ngayon at mamaya ay mga salitang nagsasad kung kailan naganap ang kilos na nagising at sasakay. Ang mga salitang ngayon at mamaya ay mga halimbawa ng pang-abay na pamanahon. Ang Pang-abay na Pamanahon ay nagsasaad kung kailan naganap o magaganap ang kilos.

Sumasagot ito sa tanong na kailan. Ngayong may sapat ka ng kaalaman sa paggamit ng pang-abay sa paglalarawan ng kilos, maaari mo ng gawin ang mga susunod na gawain.